شاعیر: ئەحمەد موختار جاف (١٨٩٦-١٩٣٥)
زمان: کوردیی ناوەندی
قاڵب: پێنج خشتەکی
کێش: فاعلاتن فاعلاتن فاعلاتن فاعلن 
{literal} {/literal}
شاعیرانی کورد بەسە بەس باسی زوڵف و چاو بکەن
شاعیرانی کورد بەسە، بەس باسی زوڵف و چاو بکەن
کەم خەیاڵی پەرچەم و کاکۆڵی ئاڵۆزاو بکەن
لابدەن کەم باسی سونبول یا لقی لاولاو بکەن
ئێوە تەدبیرێکی حاڵی قەومی دڵسووتاو بکەن
زووبەزوو تا ئیش لەدەس دەرنەچوە سا ھەوڵێ بدەن
ئێوە تەعریفی مەی و پیاڵە و گوڵ و سەھبا ئەکەن
دائیمەن ھەر باسی لەنجە و قامەتی ڕەعنا ئەکەن
سەرخۆشی خۆشە وە یا سەربەستی؟ بۆ چی وا ئەکەن
تاکوو کەی ئێوە قسەی وا پووچ و بێ مەعنا ئەکەن
زووبە زوو تا ئیش لەدەس دەر نەچوە سا ھەوڵێ بدەن
بێ کەس و بێ پشتیوانین ڕێگەمان دوورە وەرن
حەیفە ئێوە وا ئەسیری دەستی چەن قەومی کەرن
بۆ چی نازانن لە توخمی کاوەیی ئاسنگەرن
ھەڵبکەن --- کوردی ئەم ئیدارە لابەرن
زووبەزوو تا ئیش لەدەس دەرنەچوە سا ھەوڵێ بدەن
ھەڵبکەن --- کوردی مەقسەدم تاڵان نییە
پارە تەحسیل کردن و ڕووتکردنی کاروان نییە
غەیری مەکتەب بۆ تەداویی ئێمە ھیچ دەرمان نییە
ھیچ سیلاح چاتر لە عیلم و سنعەت و عیرفان نییە
زووبەزوو تا ئیش لەدەس دەرنەچوە سا ھەوڵێ بدەن
حەققە من شەو تا بەیانی ئارەزووی گریانمە
شێت نەبووم وا دایمەن ھەر مەیلی قوڕ پێوانمە
ڕۆڵە مردوو نیم بزانن شیوەنی کوردانمە
بێت و تەحلیلی بکەن دیجلەش قنگاوی وانمە
زووبەزوو تا ئیش لەدەس دەرنەچوە سا ھەوڵێ بدەن
وەک قەڵایێکی تەبیعی وایە شاخ و داخمان
قەت لە بن نایە بە خواردن میوەیی ناو باخمان
جەننەتن شاری سلێمانی و سنە و سابڵاخمان
ئیتتیفاقێ با بکەین لابەین لە دڵدا داخمان
زووبەزوو تا ئیش لەدەس دەرنەچوە سا ھەوڵێ بدەن
شێوازی MLA & APA بۆ شیعری سەرھێڵ
ئەحمەد موختار جاف. «دیوانی ئەحمەد موختار جاف/ن/شاعیرانی کورد بەسە بەس باسی زوڵف و چاو بکەن». ڤەژین بوکس. www.vejinbooks.com. سەردانی ڕێکەوتی ٢٠١٧/١٢/١٢.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.