شاعیر: ئەدیب (١٨٧٤-١٩٣٢)
زمان: کوردیی ناوەندی
قاڵب: پێنج خشتەکی
کێش: مفعولُ مفاعیلُ مفاعیلُ فعولن 
{literal} {/literal}
ساڵی دووە سەرگەشتەیە دڵ بۆ ڕوخی لەیلا
ساڵی دووە سەرگەشتەیە دڵ بۆ ڕوخی لەیلا
حەسرەتکەش و پەژموردە، سەراسیمە و شەیدا
دێوانەسفەت، تالبی شەھدی لەبی زیبا
لەو بەلد‌یەیی تەییبەدا توورە بە مەعنا
ئامادەیە بۆت، مائیدەیی نَحْنُ قَسَمْنَا
ڕێ زەحمەتە، بێ مەشعەلە، بۆ غەمزەدەیی یار
کەس ڕاھی نەجاتی نییە لەو لوججەیی خونخوار
تا بۆت نەدڕێ، فەیزی ئەجەل، پەردەیی پوندار
پەروانەیی ئەم حاڵەتە، پەڕسوختەیی نار
سەربەستە ھەزاران ئەرەنی گۆ، وەکوو مووسا
تەزکیەو و‌‌ بۆ کاڵبودە ئەی زاھید و دیندار
بێ فائیدەیە،‌ پەیڕەوی و سوحبەتی ئەغیار
جانم بە فیدای قەھقەھەیی عارفی ھوشیار
سووتاوە لەبۆ جامی مەی و ڕوتبەیی مەیخوار
عیرفان کە نەبێ، حوسنی چییە نەقشی ھەیوولا؟!
ڕوحمێ کە بە مەحبووسی ناچارییی ھاڕووت
بابێ بەرێ سەیلی کەڕەمت، حاڵەتی ناسووت
بۆ لوتف و عەتا کات، پیاڵێکی بە ماڕووت
ڕووی یۆسفی لەو میسرە، بەسە بۆ کەسی بێ قووت
پیاوێکە وەکوو شێری، کەسی تالبی مەولا
ئەی مۆنسی دڵ، غونچەیی گوڵ، ساقی مەھاسا
ئەو پەردە وەلابێخە، دەمێ بێمە تەماشا
تەسکینی دڵم بی، بە جەزا أحْسَنَكَ الله
‌لەو موژدە سەرم حازرە بۆ مەوقعی اضحی
وا کردمێ قوربانی، بە ئەنفاسی مەسیحا
مەزلووم و زەعیف و بەشەری بێ سەر و سامان
مەعلوومە کە غەرقی گونەھم، والە و حەیران
ھەرچەندە کە مەعیوبە تەنم، نابی بە قوربان
داخڵ نەبی بەم وادییە وەک مووسیی عیمڕان
بێ تەرکی عەسایی بەدەن، أَوْلَىٰ لَكَ أَوْلَىٰ
عەکسی ڕوخی تۆی دیوە لە سەفحەی گوڵی حەمڕا
شۆریدە و سەودا بەسەرە، بولبولی گۆیا
ئەز حیکمەتی حەق مەزھەرە بۆ وامیقی عەزرا
جۆیایی تۆ:پیر و وەریع ، عاقڵ و بوڕنا
ناو تەکیە، وە یا سومعە وە یا دەیر و کلیسا
ساکیت بە ئەدیبی عەبەسا عاجز و غەمگین
بەدناوی لەنێو عامی، شەقی، موفلیسی بێ دین
لایاتی تەسەووف مەدە دەم، جێ دەمی تۆ نین
ئەو حاڵەتە سینێکی دەوێ سافیی و بێ کین
دەرمانە لە بۆ قەڵبی سەقیم، ئایەتی کوبڕا
شێوازی MLA & APA بۆ شیعری سەرھێڵ
ئەدیب. «دیوانی ئەدیب/ا/ساڵی دووە سەرگەشتەیە دڵ بۆ ڕوخی لەیلا». ڤەژین بوکس. www.vejinbooks.com. سەردانی ڕێکەوتی ٢٠١٩/١٠/١٥.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.