شاعیر: ئەدیب (١٨٧٤-١٩٣٢)
زمان: کوردیی ناوەندی
قاڵب: پێنج خشتەکی
کێش: مفعولُ مفاعیلُ مفاعیلُ فعولن 
{literal} {/literal}
ئەی ماھ جەبین، ئافەتی دین، دڵبەری عەییار
ئەی ماھ جەبین، ئافەتی دین، دڵبەری عەییار
ڕووت ڕەوزەیی ڕیزوان و نەعیمی گوڵی دلدار
پڕ عەبھەر و ڕەیحان و سەمەن، سونبولی گوڵنار
قوربانی قەدت بم کە دەڵێی سەروە بە ڕەفتار
تاکەی لە خەمت دەربەدەر و سینە بریندار
لەو ڕۆژە کە ئامانجی شەھی سەخت کەمانم
دەمزانی لە ھیجری ئەلەمت نابێ ئەمانم
چون مەدحی سیفاتی تووە ھەر ویردی زمانم
باکم نییە بەو شوھرەتە بەدناوی زەمانم
ئەی وای لە دەست جەوری تۆ و تەعنەیی ئەغیار
سەوداسەریی و گۆشەنشینیی و سەلامەت
داخی غەمی مەعشووقە، نیھانیی و شەھامەت
بێ ناڵە بڕین گریە دەبێ ئەشکی عەلامەت
بەو خوایە نییە ڕوویی تۆ بێ سەنگی مەلامەت
جەبرانی دەکا غەمزەیی دو نێرگسی خەممار
حاشا لە سەر و قەوم و لە ئەحباب و برادەر
گەر حوکمی سولەیمان لە سەر ئەم موڵکە سەراسەر
یا دەستڕەسم بێ بە ھەموو موڵکی سکەندەر
بێ فائیدەیە بۆ منی مسکێنی قەلەندەر
نیساری دەکەم پاکی لەبۆ یەک دەمە دیدار
ئەی خوسرەوی خوبان سەبەبی شین و گرینم
بۆ غەمزەیی شیرینە، کەوا گۆشەنشینم
دایم بە ئومێدی نەزەرت مات و حەزینم
وا چاترە ئەم حوسنە کە جارجارە ببینم
خەوفی سەرمە ھەڵبگرێ پەردە لە ڕووی کار
تا عیشق نەبێ، مەسجید و مەیخانە بەتاڵە
عاشق چ غەمی میحنەت و فەوتی سەر و ماڵە
بۆ ئاشقی ڕووی یار، دەمی زەوق و پیاڵە
موفتی غەڵەتی کرد کە نەڵێ بادە حەڵاڵە
باوەڕ کە حەڵاڵە، کە حەرامە لە ڕیاکار
تەنبوور و دەف و بەربوت و پەیمانەیی مەزھەر
یا مسک و بخورات، لە کاشانەیی مەجمەر
سەد نەغمە ‌و سەد پەند، لە مەیخانە و مینبەر
عیزز و حەشەم و ڕوتبەیی شاھانە و ئەفسەر
نابێ بە سەفای زەوقی حوزوورت، دەمی ئەفکار
بێ تاعەت و پڕ مەعسییەت و ڕووت و عەجیبم
بێ سەروەت و بێ تۆشە و موحتاج و غەریبم
داخوازی مەی و موفلیس و بێ ھۆش و شەکیبم
حاجەت بە موعەڕڕەف نیە وا دیارە ئەدیبم
ڕووم ناوەتە سەر خاکی دەرت، عاجز و ناچار
شێوازی MLA & APA بۆ شیعری سەرھێڵ
ئەدیب. «دیوانی ئەدیب/ر/ئەی ماھ جەبین، ئافەتی دین، دڵبەری عەییار». ڤەژین بوکس. www.vejinbooks.com. سەردانی ڕێکەوتی ٢٠١٩/١٠/١٥.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.