شاعیر: ئەدیب (١٨٧٤-١٩٣٢)
زمان: کوردیی ناوەندی
قاڵب: پێنج خشتەکی
کێش: فعلاتن فعلاتن فعلاتن فعلن 
{literal} {/literal}
دەمەقاڵەی ئەدیب و دەروێش مووسا
چەند ڕۆژێ کە لە ناسازی ئیقامەم بوو لە شار
تەنی پڕ عەجز و ئەلەم، خەستە دڵی زار و نزار
مام ڕەجەب دەعوەتی کردم بە دوسەد عیز و ویقار
تەرزی ئەعیان و خەوانین بوو لەبۆ شام و نەھار
کامل ئەسپابی زیافەت، لە ھەموو جۆرێ ھەزار
ئەسڵی مەدعوو لە قیاسی، دە نەفەر بوو بە عەدەد
ئەھلی لادێیی و شاری، ھەموو خۆش خولق و جەسەد
مەجلیسی بێ غەرەز و غەیبەت و بوختان و حەسەد
کاک محەممەد بوو لەگەڵ یاری عەزیز، شێ محەمەد
کاکە مووسایی حوسێنی، سەفییی پاک تەبار
یەک‌ لە دەروازەوە نەمزانی ئەگەر غوولە نە جند
کیسوەتی ڕەسمی قەلەندەر ھەموو مەتبووع و پەسند
ھات وەژوور کەوت و لە ناگاھ، دلێرانە و توند
یا عەلی کوت بە فەسیحی و بە دەنگێکی بڵند
دیم کە مووسایە، لە دەروێشی دەدا دەم وەکوو پار
لَن تَرَانِي وتی پێم: ئەم لَنە نەفیی ئەبەدە
من کوتم: جاھیلی تۆ، دەم وەرە لەم جێگە مەدە
نان فرۆشی نییە، فەرمایشی زاتی سەمەدە
گفتوگۆی ئەو کەسەیە، ئاشقی وەجھی ئەحەدە
بێسەوادی وەکوو تۆ، بایە ‌و تەفسیر چ کار؟!
کوتم: ئەی مەردی حیسابی دەتەوێ دینداری؟!
ڕەسمی دەروێشی، کە خامۆشییە و ھوشیاری
چت لە ئایات و موعەمما و مەسەلەی عەییاری
∪∪––/∪∪––/∪∪––/∪∪–
حەللی ئەم مەسئەلە ھەللاجی نییە و –∪∪–
موتەغەییێر بوو لەسەر ئەم قسە دەروێشی حەزین
نەدەگونجا لە ھەراسانی لەسەر ڕوویی زەمین
بە نەسیب ئەم کەسە بێ، یەک سەرە خاریج بوو لە دین
سەگ لە پاشی نەدەژی ساتێ لە بەر شیددەتی قین
ھەر وەکوو کاکە ڕەزا فەرمویە: لێم بوە سەگی ھار
کوتی: لەو حاڵەتی دەروێشییە تۆ نابەڵەدی
پڕ غروور، سەرسەری و کیبری، فەقەت کاڵبودی
لە تەڕەف قەلب و مەقاماتی سەفا، بێ مەدەدی
زاھیرەن فاسقی و کافری باتین ئەبەدی
ھیچ قوبوڵ نابێ لە تۆ تۆبە لەگەڵ ئیستیغفار
کوتی: مووسام و لە ئەم عەسرەوە مەئمووری خودا
زاھیری تەن، بەشەر و باتینی لەم خەڵقە جودا
ساحەبی موعجیزە و قودڕەت و حاڵات و عەسا
یەدی بەیزا و حوزوور و قەدەم و توور و نەدا
تۆ کە فیرعەونی دەبێ حوکمە بخنکێی لە بیحار
بە دووسێ ئایە و ئەخبار و دەلیل، عاسی بوو
نە حەدیسێکی لەبیر مابوو، نە مەعنا و نە ھوو
ئیدیعای بوو لەڕووی کیزب و سمێلی پڕ موو
ڕووکەشی قەڵبی عەیان بوو وەکوو زێڕی دە ‌دەچوو
عادەتی کەر وایە، لە ئایات و خەبەر دێتە فیرار
چون لە فەرمایشی حەق، جاھیلی وا بێ خەبەرە
پێی وەیە حاڵەتی دڵ ڕشتەیی تاج و تەوە‌رە
یا غەزەڵخوانی و کەشکۆڵ و مەشاک و کەمەرە
یا تڕین و تەرەب و ڕەقس و سەما و پرچی سەرە
یا نە ئیلحاد و ئیباحەتتە،‌ سەری ئیستیکبار
بەڵی مەعلووم بوو تەبیعی، لە شەریعەت بەدەرە
بە تەبیعی چ بڵێم: ئایەتی حەق بێ سەمەرە
مەعنی قەولی خودا قسمەتی ئەھلی بەسەرە
ھەر لەبۆ ئەھلی سەفا، بەندە ئەدیب، خاکی دەرە
چم لە مووسایە، کە سەرزارییە دەروێشی حیمار
شێوازی MLA & APA بۆ شیعری سەرھێڵ
ئەدیب. «دیوانی ئەدیب/ر/چەند ڕۆژێ کە لە ناسازی ئیقامەم بوو لە شار». ڤەژین بوکس. www.vejinbooks.com. سەردانی ڕێکەوتی ٢٠١٩/١٠/١٥.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.