شاعیر: حەمدی (١٨٧٦-١٩٣٦)
زمان: کوردیی ناوەندی
قاڵب: پێنج خشتەکی
کێش: مفعولُ فاعلاتن مفعولُ فاعلاتن 
{literal} {/literal}
دەریایی حوسن و نازی مەوج و حوبابی ھێنا
پێنج خشتەکی لەسەر شیعری سالم
دەریایی حوسن و نازی مەوج و حوبابی ھێنا
یەعنی لە زلف و پەرچەم عوود و ڕووبابی ھێنا
وەمزانی بۆ چراخان مەلەک شەھابی ھێنا
«ساقی لە پەردە دەرھات جامێ شەرابی ھێنا
دڵ خیرە ما لە حیرەت ماھ ئافتابی ھێنا»
مەجمووعی سالکی عەشق کاری بە قەبز و بەستە
حیکمەت بە تاڵە ھەیئەت ئەوھامی بەرز و پەستە
لەم ئەمرەدا ئەرەستۆ بڕوانە چی بە دەستە
«تیماری چاکی سینەم ڕاجیع بە چاوی مەستە
بەختیش موافقی عەشق بۆ من خراپی ھێنا»
چ موشتەعیل چ موزلیم ئەجرامی ئەرز و کەیوان
جوملە میسالی شەونم مەحوون بە ڕۆژی ڕەخشان
ڕوو گەر نەدەی بەجێ بێ نەک ھەر بەمن بە ھەموان
«یەک زەڕڕە عەکسی پرتەو دەرکەوت و تووری سووتان
ئاوێنە سەخت ڕوو بوو لەو عەکسە تابی ھێنا»
ئەم شۆر و سوورە نەکرا ئەزەل لەگەڵ ئەلەستا
قەت ناکرێ قیامەت ڕۆژی حەشر کە ھەستا
ڕۆحم لە شادییا چوو دڵم لە غەم نەوەستا
«یارم لە دەر دەروون ھات دەستی ڕەقیب لە دەستا
غەمناک و شادمانم ڕەحمەت عەزابی ھێنا»
ویستم کە تاجی سەرنێم تاجم لەسەر فڕێ دا
سەر بەرزیم ئارەزوو بوو سەرم لە پشتی پێ دا
ئەم جوزئی ئیختیارە جیلوەی بە بەختی کێ دا
«بۆ تۆبە سویی مەسجید ھاتم بچم لە ڕێدا
بۆ کۆیی مەی فرۆشان قیسمەت شیتابی ھێنا»
مردم ئەمەندە کردم نوێژی ڕیا و تەھلیل
سووتام ئەمەندە خوێندم ئەسمائی حوببی تەعجیل
ڕامم بەوە پەری ئەو فکری نەکردوە تەعدیل
«ڕوو ھەر لە من ئەپۆشێ وا حاڵییە کە جبریل
ھەر خاسە بۆ من و ئەو ئایەی حیجابی ھێنا»
نەیدی بە چاوی نێرگس نەیبیست بە گوێچکەیی گوڵ
ئەم بەزم و نەزمە عومری نووحیشی بۆ بێ بولبول
یاقووت و دوڕڕی حەمدی ھەڵڕشت بەبێ تەئەممول
«وەی وەی چ مەجلیسێ بوو دوێنێ لە دیدە و دڵ
دڵبەر شەرابی گێڕا سالم کەبابی ھێنا»
شێوازی MLA & APA بۆ شیعری سەرھێڵ
حەمدی. «دیوانی حەمدی/ا/دەریایی حوسن و نازی مەوج و حوبابی ھێنا». ڤەژین بوکس. www.vejinbooks.com. سەردانی ڕێکەوتی ٢٠١٧/١٢/١٢.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.