شاعیر: شاھۆ (١٨٨٢-١٩٧١)
زمان: کوردیی ناوەندی
قاڵب: غەزەل
کێش: ١٠ بڕگەیی
ھەسێرەی ھیوای سەربەستی بەشەر
لە جەنگی جیھانیی دووەمدا
ھەسێرەی ھیوای سەربەستی بەشەر
لە ئاسۆی توونس سەر ھاتەدەر
وەک سوفیدەی سوبح ڕووناکی بەیان
سوپای تاریکی زوڵمی دایە بەر
بە ورشەی شوعلەی پرشنگی جوانی
دونیای سەرانسەر گشت کرد مونەووەر
لە یومنی ئەو بوو دەستەی سوێن خواران
تاجی زەفەریان ھەموو نایە سەر
بۆیە وا تێکڕا ئازادی خواھان
نازی و فاشیستان لەوێ کردە دەر
ئەم بەری دەریای ناوەڕاست ھەمووی
پاک کرایەوە لە پیسی میحوەر
کەسێک تێ فکرێ بە عەقڵ و بە دڵ
لەم گوڕە و نەڕە و فیراری ھیتلەر
ھەر لە ڕۆژھەڵات ھەتا ڕۆژئاوا
وەک گای تاڵانی چۆن درانە بەر
تێ دەگا کە وا دەستەی سوێن خواران
نەجات دەھەندەی عالەم لە خەتەر
خۆ بە کوشت ئەدەن تا بەنی ئادەم
لە چاڵی زوڵمەت، بھێنرێنە دەر
پێویستە ئێمەش بە زمان و بە دڵ
بەڕاستی بگەین سوپاسی داوەر
بەقەدەر ھەموو دونیا و مافیھا
سوپاس بۆ زاتی تەنیای دادگەر
ھەر بژی ھێزی دەستەی دیمۆکرات
بۆ ڕزگار بوونی بەشەر لە زەرەر
بە بای فەنا چن نازی و فاشیستی
دەعبای ئادەم خۆر موجەسەمەی شەڕ
1943/6/14
شێوازی MLA & APA بۆ شیعری سەرھێڵ
شاھۆ. «دیوانی شاھۆ/ر/ھەسێرەی ھیوای سەربەستی بەشەر». ڤەژین بوکس. www.vejinbooks.com. سەردانی ڕێکەوتی ٢٠١٨/٠٨/١٩.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.