شاعیر: مەلا حەسەنی دزڵی (١٨٥٩-١٩٤٦)
زمان: کوردیی گۆرانی
قاڵب: مەسنەوی
کێش: ١٠ بڕگەیی
ئەلحەمدولیللا شەربەت وریاوە
ئەلحەمدولیللا شەربەت وریاوە
مانگ نەتۆی زوڵمات، ھەم وردریاوە
دەروازەی شادی، دیسان کریاوە
فانووس خەڵوەت، باز ھوور کریاوە
ستارەی طالع، چونکە سەعید بێ
ڕووی طلوع وەلای، حەمەسەعید بێ
ئێڵانپێ غەمگین، بێ تۆ بێ نوور بێ
وەھار جە دووریت، شەتاوش سوور بێ
ئەر فیردەوس بیا، بەخوا بێ سوود بێ
دنیا بەبێ تۆ، ھەر بێ نموود بێ
وەھار جە داخت، ھێندە حەسرەت وەرد
ھیچ کەس نەزاناش، چەنی بی ویەرد!
عەشرەت بێ تەدبیر، ھم بێ سەردار بێ
مەلوول و عاجز، مات و غەمبار بێ
یا ڕەب! شوکر بە کەرەمداریت
سەنا بە لوتف و بزرگەواریت!
جە سایەی خوا، مۆرە خاس ئاما
مانگی چواردە جە کەل بەر ئاما
بە شادمانی نەتۆی ھەور غەم
ستارەی طالع سەر کێشا کەم کەم
تایەفە و عەشرەت، قەومان و خوێشان
نەمەند بار غەم، نەسەر لێوشان
عەیاڵ و کڵفەت، چەم و دڵ ڕۆشن
ئاسوودەخاتر، چایی بنۆشن!
پیر و ڕیش چەرمە، وەک سەبزەپۆشن
دۆخەوای پاک، خاس ھوربلووشن
گاھێ پیشەپیش، گاھ مووشەمووشەن
سمێڵ چون شەوماڵ، ڕیش وێنەی پووشەن
ئەمجار بنیشە جەلای ماڵەوە
ملا جەلاشان بە بەرماڵەوە
بدیە نازاران، مل بە خاڵەوە
قەتارە جە لای ھانەچیاڵەوە
بازوو بە بازن، بە خرخاڵەوە
بەو لەنجە و عیشوە، قەد شمشاڵەوە
مەلا بە جەزبە و بە ئەحواڵەوە
منیچ سەر و مل، وەکوو داڵەوە
با لاپشان ئەی، قسە بە پێتان
سڵامم وە لای، گەورە و وردیتان!
ئەو حەمەزەمان، چەنی قارەمان
ئەسەد و مەحموود، تاھێر و عوسمان
ئەسکەندەر، چەنی باقی برایان
قەومان و عەشرەت، ھەم ئاشنایان
مامۆسای عابید، ھەم پێشەوای دین
خەلیفەی سەروەر، چون شێخ شەمسەدین
خاتوو فەرەنگیس، خوشکی دنیا و دین
بە ڕوو وەشی ئەو، ھەزار ئافەرین!
یا ڕەب ھەر ساحیب، عەشرەت و پشت بای!
سەرحەڵقەی زومڕەی حۆری بەھەشت بای!
شێوازی MLA & APA بۆ شیعری سەرھێڵ
مەلا حەسەنی دزڵی. «دیوانی مەلا حەسەنی دزڵی/ئەلحەمدولیللا شەربەت وریاوە». ڤەژین بوکس. www.vejinbooks.com. سەردانی ڕێکەوتی ٢٠١٨/١٠/٢١.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.