شاعیر: مەلا حەسەنی دزڵی (١٨٥٩-١٩٤٦)
زمان: کوردیی گۆرانی
قاڵب: مەسنەوی
کێش: ١٠ بڕگەیی
زاڵم سەرنگوون
نامە بۆ ئۆسا ڕەسووڵ و ئۆسا حەبیب
ئەی ئۆسا ڕەسووڵ، ئەی ئۆسا حەبیب!
ھەر دوو وەفادار، براڵەی نەجیب
سلامٌ عليك جە دوور وەڵاتا
حاڵ پەرسا و دۆعا، ھەم مەرحەباتا
کوا مەرحەمەت ھەردە جارانتان
مەرحەبای سوبح و ئێوارانتان
کەوتەنۆ دڵم، ئارەزووی وەتەن
تاڤگەش وناو، خاک سورمەی چەمەن
دەروونم بیەن وە تافی ئەزمەر
ئای پەرێ ناڵەی تافی بەختەمەر!
ئەر قسمەت نەبۆ، وێتا سڵامەت
شمە وەشتا بۆ، وە بێ مەلامەت
وەتڵە و کۆلارە و، ھەم سپی کەمەر
ئاخۆ گیواوشا، سەر ناردە بۆ بەر؟
ھەرچێوەت کەردەن، دینارێ ڕووەن
ھەر بە گۆترە، نەک بە سەنگ و مەن
زەحمەت بکێشە بکیانە پەرێم
با منیچ دڵم، نەمەنۆ پەی وێم
وزۆنە یانە، بۆی عەتر و عەبیر
تا ھەورامانم، من نەشۆ نەویر
ھەرچەن مەزانوو ڕەزا خانیا
جە وشک و جە تەڕ، ئیباشا نیا
ھەر پێسە سپای یەئجووج و مەئجووج
سیا و زەڕەتاڵ، ھەلووع و لەجووج
ئاخر کام قانوون، کام شەرع و کام حەق
سەرحەد ما مارا و گێرامانە شەق؟!
مەر ئێمە ملمێ، ھەتا ھەمەدان
یا زوڵمێ کەرمێ، جە خەڵکی تاران؟
وەسەن تەجاوز، وەسەن تەعەددا
لەحنەت تا وەنە، لەحنەتی خودا!
پێسە ھاڕیەی، دنیاشا ھاڕا
مەرز و حورمەت و ئێمەشا ماڕا
چەن ساڵا سینە و ئێمە سپەرا
ڕاوە و عەرب و تورکمان نەوەرا
ئێمە کەردەنما جەنگ و دەوڵەتا
چێش شا گەرەکا، ئی بێ وڵەتا؟
سا خوا تا کەی، ئی وەڵاتمانە
یاگە و ستەم و ئی زاڵمانە؟
فەسادشا وستەن نەڕووی سەربیسات
بەش باوە عیبرەت، ڕووسیای ولات
کەی سەردارێ بێ، سەروەری بارۆ
ھەر جە ھەمەدان، قولێشا ماڕۆ؟
خیگە کەرەوە، ڕووەن کیانە
چەقەڵ و تووتە، نەبا بەھانە
ئیتر عەزیزم، من واز نمارو
پەی ئامای ڕووەن، ڕوە مژمارو!
وەڵامی ئۆسا ڕەسوڵ
ھۆرزە بۆرەوە، فەرموودەی شێخەن
بڕیەی ئا شێخی، ھەر پێسە تێخەن
ئێستە بانی شار خەرەنگ و مەشا
دزڵی ە ئێساڵ وەھارش وەشا
سەروازە لاتە کەردش یانەرە
خیگەش ھاڵی کەرد، ھەڕەم سەرەرە!
ڕووەن نەمەنەن، بێ دەردی سەری
قنگە و ڕەزا شایش، پەنە چەرب کەری
نیزامی ئامێ، کەردشا یانەرە
خیگەشا گووشا، داشا چەمچەرە
ئاخر بێچارە، کڵۆڵ نگوون بەخت
پێسە تەوەن و، ڕۆخانەی سەرسەخت
ئەچی تاڵانە و ئەچی زەرەرە
مەر تۆ ھەر ھەڕە کەری سەرەرە
ھورزە بۆرێوە، نەمەنەن وەرشۆ
مەواچە ئیتر، وڵاخ بەرمەشۆ
سا تۆ پەروەردەی، ھەوای کەش وکۆ!
گیانە تۆ چکۆ، شارەزوور چکۆ؟
دۆعایێ کەروو، بەشکا بۆ قەبووڵ
ئینە بژنەوە، خوا جە ڕەسووڵ
وەعدەو خوایا، زاڵم سەرنگوون
ئی داگیرکەرا، گنا تووناوتوون
دەس جە ئازار و ئێمە بکێشا
یا خۆ گێڵاوە، وەڵاتو وێشا
وەرنە تا زاڵم پێسە ھورپاچۆ
مەعلوومەن مەزڵووم ھەر پێسە ماچۆ
شێوازی MLA & APA بۆ شیعری سەرھێڵ
مەلا حەسەنی دزڵی. «دیوانی مەلا حەسەنی دزڵی/ئەی ئۆسا ڕەسووڵ ئەی ئۆسا حەبیب». ڤەژین بوکس. www.vejinbooks.com. سەردانی ڕێکەوتی ٢٠١٩/٠٨/١٧.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.