شاعیر: مەلا حەسەنی دزڵی (١٨٥٩-١٩٤٦)
زمان: کوردیی گۆرانی
قاڵب: مەسنەوی
کێش: ١٠ بڕگەیی
مەلا حەسەن و حاجی شێخ محەممەدی دادانە
نامەی مەلا حەسەن بۆ حاجی شێخ محەممەدی دادانە:
دادانە ماوا، شێڵانە وەرە!
عابا نە کۆڵ و عەمامە سەرە!
زیرەک و وریا، وەش ڕەنگ و وەش دەنگ
سەرتاپا مەتین، شێخی شۆخ و شەنگ!
نە دەربەند دزڵی، شەو وە ڕۆ کەردە!
جە مەڵەوەرد و زەڵم ویەردە!
ڕەفێقی ڕاکەی، کەشی ھەورامان!
ھەشەڕا، سورێن، کانی خەیاران!
دیت کە زەمانە چەن قیزەونا؟
پەرێ تۆ یار و پەی من دوژمنا!
بدیە تەفاوەت، شێخی و مەڵایی
شێخی وەشتەرا جە پادشایی
خاست فەرماوا مەڵا نیەنا
ئەجدادم شێخ و ھەر شێخ بیەنا
ڕەحمەتت وەنە، سەد بارەکەڵا
تەبەررات کەرد و، وێت نەکەرد مەڵا!
تەدریس و فتوا و، جومعە و جەماعەت
بانگ و ھەم سەڵا و ئەزکار و قامەت؛
لەم و ئاورایی، کەی تێر مەکەرا؟
کەی بار ئاساوێ، وە ئاساو بەرا؟
سا بوو بە سەرگەرد لفکە و عەمامەت
لیباسی ڕەنگین، پێسە شەمامەت!
ڕیشی موبارەک، لفکە نەگەردەن
ھیچکەس پێسە تۆ، کارش نەکەردەن
سوبح و وێرەگا، بوەرە، بووسە
گاگا پەی کەسی، دۆعایە نووسە
چێش و چێش فرە، فرە و فراوان
تۆ فەرماوە چێش، ماچا: بە چاوان!
چونکە زەمانە پێسە پێش ئامان
خاست کەرد لوای نە کۆڕی شێخان
بە ياهو ياهو، سواری کەرە
کەرتە کەرگەلێ و، عەنبەربۆ وەرە
نۆشوگیانو تۆ، ئەی برای دانا!
ڕایە خاست گێرت، خاس چەنەت زانا
بابەگەورەما کوتێوش شانان
جەو ڕۆ تا ئیستە، ویردوو زوانان
جە ئادەم و نووح، ھەتا ئی زەمان
ھیچ کەسێ کوتێ، چینەش نەشانان!
گیانش فیدا کەرد، پەرێ من و تۆ
دەک -- وەش بۆ، ئافەرینش بۆ!
من بیا مەڵا و، تۆ وێت کەرد بە شێخ
من قورپینەدای، تویچ بە زەرگ و تێخ
قەسیم و وەسیم، یاوناشا بە کۆ
ھەرچی بڕەما، مەیاوا وە تۆ
حەسەن ھەرکەسێ مەسئولو وێشا
ھەرکەس حیسابو وێش چەنە کێشا
ئیتر والسّلام، ئامۆزا ئازیز!
ئینتیزارەنا تا فەسڵی پاییز
وەڵامی حاجی شێخ محەممەد:
ھەورامان ماوا، تەڕەتوو وەرە!
فەرەنجی نە کۆڵ، مێزەرە سەرە!
ئوستادی دانا، ئاگا بە ئەسرار!
عالمی عامڵ، عارفی ئەحرار!
ناخواستە وەلی، ناکەردە مراد!
مایەی ئیفتخار، ئەحفاد و ئەجداد!
گەورەییت کەردەن، پەرسانت پەرێم
ھۆشت نەشیەنا، مزانی من کێم
نەوەی مەردۆخ و سولالەی پاکان
ڕۆڵەی پەروەردەی، پیری ھەورامان
فەرماوات: مەردۆخ، ئیسارش کەردەن
گیانی وێش فیدای، نەسڵی وێش کەردەن
ڕاست فەرماوا، ئەربابی ئیخلاس
دەخیلەن نەوزیم، نەبابی قیاس
من حەدم چێشا، قابلم چکۆن
عیلم و مەعریفەت، ھەر لایەق وە تۆن
تەقریر و تەحریر، فتوا و ئیفادە
ھەر لایەق وە تۆن، جە ئێمە لادە
کەی واتم مەڵا یا شێخی ئیرشاد؟
کەی بە من گنۆ، فتوا و ئیجتھاد؟
کام شێخێ و کەسێ، مورشد و پیرێ؟
کام عیلم و عیرفان، دانایی و ژیرێ؟
بابا مەردوخە، ھەزار ئافەرین!
ڕەحمەت جە ڕۆحش، ھەتا يوم الدّين!
کوتێوش شانا، ھەزار ماشەڵا!
احْسَنُ الکوت بێ، لا حول و لا
گەراش چون ماساو، بەحری بێ پایان
نەھەنگ ھورگنۆ نەتوولی زەمان!
قوتابی و شاگرد، یا ئاموزایی!
پەی تۆ بێ فەرقا، شێخی و مەڵایی!
بەش خوا عومرم، بدۆ تا پاییز
جارێ تەر وینو، دیداری ئازیز
یاخوا نەڕێزۆ، پەنجە و خامەکەت
ئانی وەفیدای، ئامای نامەکەت
شەرتەن نامەکەت بگێرو نە بەرگ
بنیەوش نە سینە، تا وە ساتی مەرگ
شێوازی MLA & APA بۆ شیعری سەرھێڵ
مەلا حەسەنی دزڵی. «دیوانی مەلا حەسەنی دزڵی/دادانە ماوا شێڵانە وەرە». ڤەژین بوکس. www.vejinbooks.com. سەردانی ڕێکەوتی ٢٠١٨/٠٢/١٩.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.