شاعیر: مەلا حەسەنی دزڵی (١٨٥٩-١٩٤٦)
زمان: کوردیی گۆرانی
قاڵب: مەسنەوی
کێش: ١٠ بڕگەیی
قیبلەگای حاجەت کەعبەی ڕاستان
قیبلەگای حاجەت کەعبەی ڕاستان
تووتیا ئاسا، خاک ئاستان
شەمس مەشاریق، بۆرج بیارە
تەلعەت نوورئەفشان، وە ھەر کنارە
شەمس موقتەبیس نووری مەحاسن
جازبەی ھیممەت چون ڕوبای ئاسن
بەدر ویلایەت، شەمس نەبووەت
ھەردوو موزەییەن سەما و عولووەت
شارەزای ڕاگەی سەحرای کیبریا
شێری سلسلەی زومرەی ئەولیا
غوّاصِ شھوود بەحری تەجەللا
پیری موقامات ڕای فنا في الله
شەھنشای سەریر عەرش ڕەببانی
سوڵتانی ئەقلیم زومرەی ڕۆحانی
شاھ فەرماندەی قوای شەریعەت
قوەی ئیستعلای لیوای تەریقەت
ڕوتبەی قطبیّت زات جبیللی
شایستەی شاھی بە شوورای میللی
والای تاجدار فەرمان­فەرمای دین
سوڵتان فاتێح چین و قوستەنتین
سوڵتانی بەررەین، خاقان بەحرەین
کەششافی تەفسیر کاف ھا یا عەین
ئیقامەی ستوون لیوای پێغەمبەر
ئەعلا طیّبەی الله أکبر
ئەحیای دەیمەجۆی جومعە و جەماعات
میراو جۆبار مەزرەعەی تاعات
ئاینەی زەمیر، جام جھانبین
تەلخانەی ئیلھام ربّ العالمين
مەشریق بە مەغریب شاباڵ کەشیدە
دوو دنیا دیدە، بە ھەر دوو دیدە
قوببەی ئیستیعلای دەوڵەتسەرای دین
یا پەنای ئیسلام یا عەلائەدین!
بەو بەشق ئەو جام بادەی ڕۆحانی
بەو شوعاع نوور، زیای عوسمانی
بەو مەحرەمی بەین، وێت و خوای وێت
بەو نوورین قامەت بەو خاک پای وێت
بەو جگەرگۆشەی وەلیعەھد وێت
عوسمان ئەرشەد شێوەی جەھد وێت
وەختی تەنگانەی غەرغەرەی نەفەس
ناڵەی مورغ ڕۆح، نە سینەی قەفەس
شەیتان بەو قەدەح، سەردە ئاو یەخ
ئەبلەقی چەمان، ھورتەکنای زەنەخ
یاوی وە فەریارد پەشێو ئەحواڵان
خەزانەی ئیمان نەشۆ وە تاڵان
حەیفەن من بە تۆ وێم سپۆردە بۆ
لاشەم نە مەیدان وەرگا واردە بۆ
فیدای ھاژەی باڵ ھەڵۆ ئاسات بام
ھەوەسنای شەیتان، بێ مەواسات بام
بەو شاباڵ وێت گیجاولوول دەرپێش
چون جەنگی سیمورغ وەسەر بەچەی وێش
وەختێ جەنازەی مەحموود ئەو پابۆ
ھیمەتت چون وێت، بە دەرقەی ڕابۆ
خاک ئاستانەت وە تاج سەر کەم
وە نیشانەی تۆ، ڕوو نە مەحشەر کەم
شێوازی MLA & APA بۆ شیعری سەرھێڵ
مەلا حەسەنی دزڵی. «دیوانی مەلا حەسەنی دزڵی/قیبلەگای حاجەت کەعبەی ڕاستان». ڤەژین بوکس. www.vejinbooks.com. سەردانی ڕێکەوتی ٢٠١٩/١٢/٨.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.