شاعیر: مەلا حەسەنی دزڵی (١٨٥٩-١٩٤٦)
زمان: کوردیی گۆرانی
قاڵب: مەسنەوی
کێش: ١٠ بڕگەیی
میرزای موھاجر شەریەتخانەی خەم
ئەم شیعرەی بۆ محەممەدی حاجی مەلا ساڵحی تەوێڵە نووسیوە کە لەبەر سەربازی چووەتە دزاوەر
میرزای موھاجر، شەریەتخانەی خەم
وەتەن تەویڵێ، مەسکەن نە عەجم
ئاھوو پەروەردەی، ھەوای عیراقی
ئارەزووی وەتەن، نە دەروون باقی
تەیری ئاشیان، تەوێڵە ماوا
یانەی دڵ وە خاک، غەریبی ئاوا
عەبدی ڕەزا بەند، بە قەزای سەمەد
جەنابی ئەکرەم، میرزا محەممەد
شەمسی تەوازوع، زومڕەی گوستاخان
ھەڵقەی سیلسیلەی، قەدیم ئوجاخان
دەروون پێچ وەردەی، خوونی ئیجباری
وێنەی کەتیرەی، شووشەی جەباری
ئیسە جای مەتڵەع، چون شەمسی خاوەر
تلۆع نە مەشریق، سەر کۆی دزاوەر
مەبارەکتا بۆ گیزەی سەماوەر!
جەھەننەم جە گۆشت، برنج و ساوەر!
دمای وەزیفە و دوعا و سەلامەت
دۆعاگۆیی خەیر، ھەم ئیحترامت
دەخیل سەد دەخیل، بێ مەرەکەبم
خەڵک عاجز جە دەست، یا ڕەب یا ڕەبم
چەن قسەی ماتڵ، نە تۆی دەنداندا
چەن مەتڵەب مەندەن، نە قەڵەمداندا
ھانا و ئیلتیجام وەلات ئاوەردەن
دەرد جە حەکیمان، کێ پنھان کەردەن؟!
ئەڵبەت میرزا گیان، ھەر جۆرێت کەردەن
ئەگەرچی پەنات، بە بەغداد بەردەن!
بەعزێ مورەکەب، سیای سوندووسی
بەریقەی کێشدار، خەت ئابەنووسی
سەوادش وێنەی، زوڵفی نازاران
عەترش چون سینەی، ئەڵفەندی داران
نە تەوێڵێدا، بسانە پەرێم
تا نەجابەتت، مەعلووم کەرۆ لێم
ھەرچەن مەلاقات چەنی تۆم نەبیەن
بابەو من ھەرگیز، بابەو تۆش نەدیەن
بەڵام بە تەعریف وارەزام ئەحمەد
سەنای تۆ وانان، فەراوان بێ حەد
مەحەببەتی تۆم، وە دەروون ئاوەرد
ھا من دووراودوور، مەیلم زیاد کەرد
چون تۆ برازای، ئەو مامۆسانی
چەمان سیلسیلەی، ئیمام مووسانی
ھەردوو سەرئەفراز، ھەردوو سەربەرزەن
وێنەی دوو کاڵەک، ھەر جە یەک تەرزەن
تویچ بە وێنەی ئەو، جۆیای خاسە بە
ئەو چەنی بیەن، تویچ ھەر پاسە بە!
جەوھەر سەوز و سوور، گەرەکم نییەن
فیکری قەدیمم، جە یاد بەر شیەن
ساف و بێ غەش بۆ، چوون تووتیا بۆ
وێنەی بەختی وێم، ھەر با سیا بۆ
براژەن غونچە، کومەکم کەرۆ
پەرێ مورەکەب، خەمو من وەرۆ!
تا کە بوانوو، وەختی سوبح و شام
پەی فەرزەندی ئەو، عەبدولواحد نام
بواچوو یا ڕەب عومرش درێژ بۆ
پیاڵەی بەختش، پەڕ بۆ، لەبڕێژ بۆ!
باخی جوانیش، ساحێب سەمەر بۆ
مەحفووزی زوڵمات، قەزا و قەدەر بۆ
ئەر چێر زەمین بۆ، بوزەش سەر زەمین
جوابم مەکەرە، تۆ حیسامەدین!
1926
شێوازی MLA & APA بۆ شیعری سەرھێڵ
مەلا حەسەنی دزڵی. «دیوانی مەلا حەسەنی دزڵی/میرزای موھاجر شەریەتخانەی خەم». ڤەژین بوکس. www.vejinbooks.com. سەردانی ڕێکەوتی ٢٠١٨/١٠/١٩.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.