شاعیر: مەلا حەسەنی دزڵی (١٨٥٩-١٩٤٦)
زمان: کوردیی گۆرانی
قاڵب: مەسنەوی
کێش: ١٠ بڕگەیی
پەوکێ چی دنیا شادی و وەشیمەن
بۆ چەند دۆستێکی لە دەگاشێخان
پەوکێ چی دنیا شادی و وەشیمەن
بینایی دیدەم عەبدولحەکیمەن
ئامان و دەخیل بیاوەم پەنە
کیسەی تەماکۆم تۆزش نەمەنە
حەمە کەریم گیان نەتەوەی ئاڵتوون
کۆنە تەڕەوان، وێنەی ئەفلاتوون
حەمە قسەوەش، حەمە زوان وەش
گەورە تەڕەوان، چوار و پەنج و شەش
قلیان بەوێنەی بزڵە ھەتیمە
عەرزەش ھەن وەلای ئەحمەد ڕەحیمە
ئەر جە ھامسایا وێت دزیت کەردەن
یا چنگڵە ڕوکێ، یا گزیت کەردەن
نام وردە دانەی، خەربەنگت ھاڕان
نام جە تەماکۆی، بن پەلت ماڕان
یام ساقە زلت ھاڕان بە دنگێ
قلیان ماتڵا پەیم کیانە چنگێ
ئەر ھیچکام نەبی، گزگلێ ھاڕە
بیاونەم پەنە، حاڵەتم فاڕە
قلیان سیاقیر، سینەم تەنوورا
ھا شیم وەھەردا، پەی ھەشەنوورا
ئیستقبال کەروو جە قۆزەداران
بەش نەفەسێم دا، جە ژحرەماران
سینەم ئاشوفتە، دەروون ناڵەشا
ھەناسم گیزەی، زەردەواڵەشا
پێچی مێزەرەم، وێنەی کالیارەن
ھەیکەلم وێنەی، ئوسا دانیارەن
ئەمانەتیت بۆ، وەختی عەلاجەن
ڕیش و سمێڵم، وڕەی ھەلاجەن
ھا نەختێش مەنەن بەیا نەسەردا
وا چون قنگڵاشک، بەرۆش وەھەردا
ئارۆ پەنج ڕۆین، قلیانی ھاڵی
مژوو تا چەشوو، ژاراوی تاڵی
ژارش تەمام بی، تاڵیش ھیچ نەمەن
شیرین بی دلێش، چون شەکەرو قەن
حەسەن جە دزڵی، وای سەر ئێڵاخان
ھاوارت یاونۆ، بە دەگاشێخان
چون داشێخانی، ھەر پەی خواینێ
پەی شێخ و مەڵا، ھەر جان فیداینێ
ئافەرینتا بۆ، دەگاشێخانی
گیان فیدای عیلم و دین و ئیمانی
ئیشەڵا وەختێ حەشرەما کەرا
چەنی سولەحا، نامێما بەرا!
حەدیسەن ھەر کەس، چەنی کەسێ بۆ
پەی خزمەتی عیلم، پێسە مەسێ بۆ!
ئاخ جا چەن وەشا، پێوە جە مەحشەر
حەشرما کەرۆ، خالقی ئەکبەر!
جا ملمێ بەھەشت پێوە ئیشەڵا
احسنُ الحَیات، تَبارک اللە
شێوازی MLA & APA بۆ شیعری سەرھێڵ
مەلا حەسەنی دزڵی. «دیوانی مەلا حەسەنی دزڵی/پەوکێ چی دنیا شادی و وەشیمەن». ڤەژین بوکس. www.vejinbooks.com. سەردانی ڕێکەوتی ٢٠١٩/٠٨/١٧.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.