شاعیر: گۆران (١٩٠٤-١٩٦٢)
زمان: کوردیی ناوەندی
قاڵب: عوسمانلی
کێش: مفاعلن فعلاتن مفاعلن فعلن 
{literal} {/literal}
بۆ سالم
بە یادی تۆ ئەگرێ دەستی عاجزم خامە
دەھایی ڕۆشن و بەرزت ئەگاتە ئیمدادم،
ھونەر نییە کە ئەناڵێ ڕوبابی ئینشادم،
تەزەککورت سەبەبی سانیحات و ئیلھامە!
لە دائیرەی سەلەفا ئەی قەریحە ڕوون و ڕەوان،
کەسم نەدی کە وەکوو تۆ خوڕەی بێ ئاھەنگی،
بە حوزنی پڕ لە بەدیعە وەکوو کەلیم گریان،
ئەگەرچی وێنەیی حافز بە غەلغەلە و شەنگی...
لە ئاسمانی فەخردا شیعر بوو باڵێکت،
ئەوی ترت بە تەبیعەت شعووری میللی بوو،
لە شەوقی حوسنی بتێ بوو ئەگەر خەیاڵێکت،
ئەوی ترت خەم و عەشقی وەتەن مەئالی بوو.
نەبوو فەڕی لە نیگاھی غەریبتا تاران،
سەریر و ئەفسەری شاھیت ئەکرد فیدایی وڵات،
کە کەوتە پەنجەیی غەدر و جەور زەویی بابان،
بەقەد غەدر غەزەلت وت، بەقەد جەور ئەبیات!
وتت بە حەزرەتی نالی ڕەفیقی دەربەدەرت:
«خەیاڵی عەودەتی موڵکی ئەسیر نەخەیتە سەرت
زەلیلی نەجم و ھیلالە، شەوە سلێمانی
غورووبی کردەوە ڕۆژی شکۆھی بابانی...»
بنوو لە قەبرە کەتا موستەریح بە ئەی سالم،
لە تۆ کوردترە ئێستا نەزان ھەتا عالم!
شێوازی MLA & APA بۆ شیعری سەرھێڵ
گۆران. «فرمێسک و ھونەر/بۆ سالم». ڤەژین بوکس. www.vejinbooks.com. سەردانی ڕێکەوتی ٢٠١٩/٠٩/٢٤.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.